Valdeorras convértese no epicentro de lecer e festivo da provincia de Ourense coa celebración da XXI edición da súa Feira do Viño
O presidente do Consello Regulador da D.O. Valdeorras, José Luis García Pando, puxo en valor hoxe durante o acto inaugural da XXI Feira do Viño da comarca a recente consecución da acreditación ENAC por parte do Consello Regulador. Destacou que se trata dun mérito colectivo que vai permitir á D.O. gañar en seguridade xurídica e tamén en imaxe, pois son moitos os territorios amparados do Estado que carecen aínda desta acreditación, esixida pola UE.
Xunto a isto, tamén indicou que o Consello Regulador traballa na dirección de afianzar a marca vinícola Valdeorras. Neste sentido, indicou que “se o conseguimos, non só estaremos sendo quen de vender viño, senón tamén territorio, paisaxe e patrimonio”. “Estaremos contribuíndo, ao tempo, a xerar fluxos de turistas arredor do viño valdeorrés (o que se coñece coma enoturismo)” engadiu. Na mesma dirección, o alcalde do Barco, Alfredo García, animou na súa quenda de intervención todos os presentes a que cada vez que pidan un viño, pidan un Valdeorras, “ao igual que se pide, por exemplo, un ribeiro”.
O presidente do Consello Regulador destaca, no acto inaugural da feira, a recente consecución da acreditación ENAC por parte do organismo
Pola súa banda, o vicepresidente da Deputación de Ourense, Rosendo Fernández, puxo en valor o esforzo da institución á que representa de cara á incorporación dos máis novos ao sector vitivinícola provincial e, finalmente, o subdelegado do Goberno en Ourense, Emilio González Afonso, eloxiou os viños valdeorreses, dos que dixo “están merecidamente recoñecidos” en todos os recunchos.
Actividades paralelas
A XXI Feira do Viño de Valdeorras, que se celebra na praza barquense de Viloira, conta coa participación de 20 adegas da comarca, e sitúa a Valdeorras no epicentro de lecer e festivo da provincia de Ourense durante dous días. O recinto feiral permanecerá aberto en horario de 12,30 a 14,30 horas e de 19,30 a 23,00 horas. A feira conta cun programa completo de eventos paralelos que inclúe actuacións musicais e actividades para os máis cativos.
Ao longo de toda a fin de semana, funcionará o tren Valdeorras Expreso para facilitar os desprazamentos de ida e volta ata o recinto feiral. O percorrido comprende saídas desde o polideportivo, pasando polo hospital e a praza do Concello ata chegar á Praza de Viloira.
Entre hoxe e mañá, un total de 20 adegas da comarca exhibirán o mellor da súa colleita
A continuación, detallase o nome das 20 adegas participantes na XXI edición da Feira do Viño de Valdeorras:
| 1 | ADEGA A COROA S.A.T. |
| 2 | ADEGA O CEPADO S.L. |
| 3 | ADEGA ALÁN S.A.T. |
| 4 | BODEGA COOP. JESÚS NAZARENO S.C.G. |
| 5 | BODEGA COOP. VIRGEN DE LAS VIÑAS S.C.G. |
| 6 | BODEGAS GODEVAL S.L. |
| 7 | ELADIO SANTALLA PARADELO C.B |
| 8 | FELIPE MAYO ALONSO |
| 9 | GUITIÁN Y BLANCO S.C. |
| 10 | JOAQUÍN REBOLLEDO S.A. |
| 11 | Mª TERESA NÚÑEZ VEGA |
| 12 | ADEGA MELILLAS E FILLOS S.L. |
| 13 | S.A.T. ADEGA O CASAL |
| 14 | QUINTA DA PEZA S.L. |
| 15 | BODEGA ROANDI S.L. |
| 16 | BODEGAS RUCHEL S.L. |
| 17 | BODEGAS SAMPAYOLO S.L. |
| 18 | SANTA MARTA S.A.T. |
| 19 | VIÑA COSTEIRA S.C.G |
| 20 | VIRXEN DE GALIR S.L. |
