Os viños de Valdeorras seducen A Coruña nun Showroom con diversas actividades orientadas tanto a público especializado como xeralista

Na iniciativa, que se celebra hoxe no Hotel Finisterre da cidade herculina, participan 19 adegas do territorio amparado

“A cidade da Coruña sempre foi e será un mercado prioritario para os nosos viños e hoxe, de novo, traemos un pequeno anaco do noso territorio amparado ata esta urbe co obxectivo de dar a coñecer os mellores brancos e tintos que producimos en Valdeorras e que están a conquistar todo tipo de padais”. Son palabras do máximo responsable do Consello Regulador da D.O. Valdeorras, José Ramón Rodríguez Castellanos, para poñer en valor o acto promocional que a entidade que preside promove ao longo de todo o día de hoxe no Hotel Finisterre da cidade herculina.

Este evento promocional, no que se poden degustar viños de 19 adegas (case a metade das que conforman o territorio amparado) valdeorresas, consta de diversas actividades orientadas tanto a prescritores e públicos especializados como a outros de corte máis xeralista. “O obxectivo último é dar a coñecer o noso potencial vitivinícola ao maior número de persoas posible para que saiban que somos o berce do godello, pero que tamén somos quen de elaborar tintos dunha excelente calidade”, continúa Rodríguez Castellanos.

Cata profesional
A axenda de actos desenvolvida no marco deste showroom arrincou onte coa celebración dunha cata, promovida polo equipo do prestixioso sumiller Luis L. Paadín, e dirixida polo director técnico do Consello Regulador, Jorge Mazaira, que se orientou a un público profesional. Sumilleres, adegueiros, consumidores especializados, xornalistas e bloggers foron algúns dos perfís que conformaron o grupo de case 30 persoas que participou nesta cata comentada, na que se divulgaron datos técnicos e curiosidades sobre o xeito de elaborar viños nun territorio amparado, o de Valdeorras, que se caracteriza por contar cunha gran variedade de solos para o cultivo da uva.

Ao longo da xornada de hoxe, entre as 11.00 e as 14.00 horas desta mañá, e de 17.00 a 21.00 horas da tarde, os adegueiros desprazados ata a cidade herculina ofreceron unha degustación do mellor das súas colleitas nun acto aberto a todo tipo de público, que xerou unha gran expectación e afluencia de visitantes. Amais disto, a subdelegada do Goberno na Coruña, María Rivas, desprazouse ata o Hotel Finisterre para coñecer, de primeira man, o bo facer vitivinícola de Valdeorras, unha visita que o presidente do Consello Regulador quixo agradecer “moi especialmente”.