O C.R.D.O. Valdeorras divulga a potencialidade do territorio amparado e dos seus viños nun curso de sumillería en Salamanca

As cualidades organolépticas do viños valdeorreses, os seus matices e as variedades de uva presentes na zona, así coma a historia e os valores diferenciais do territorio amparado (clima, tipos de chan, etc) centraron a presentación que membros do equipo técnico do C.R.D.O. Valdeorras impartiron hoxe en Salamaca. Fixérono no marco dun curso avanzado de sumillería que se celebrou nas instalacións de Centro de Referencia Nacional de Formación Profesional do Servizo Público de Emprego de Salamanca.

Convidados por este organismo, de referencia no seu campo dentro do noroeste peninsular, os técnicos do Consello Regulador “tentaron achegar un anaco da idiosincrasia dos viños valdeorreses aos alumnos do curso”, destacou o presidente da D.O., José Luis García Pando. “As actividades de formación son practicamente tan importantes para nós como as de promoción, posto que nos axudan a divulgar entre públicos especializados os valores singulares dos nosos viños”.

 Membros do equipo técnico do organismo impartiron hoxe a formación no Centro de Referencia Nacional de Formación Profesional do Servizo Público de Emprego de Salamanca

Centros de Referencia Nacional
Os Centros de Referencia Nacional (CRN) son centros públicos de innovación e experimentación en materia de Formación Profesional. De carácter sectorial, emprázanse en diferentes comunidades autónomas e, polas súas instalacións e traxectoria, son considerados de excelencia, tanto no desenvolvemento de accións de investigación coma na impartición de cursos. Para a asistencia a estes cursos, os traballadores desempregados poden recibir bolsas e axudas para desprazamento.