/* */ As choivas deste inverno atrasan lixeraimente os traballos de poda na comarca
11 Feb 2020

As choivas deste inverno atrasan lixeraimente os traballos de poda na comarca

 

Traballos de poda da Adega O Cepado na Finca Valdeseara (Rubiá)

As choivas rexistradas na primeira metade do inverno son as causantes de que o inicio dos traballos de poda se atrasaran lixeiramente na comarca con respecto  a outros anos. Así o considera Diego Fernández, xerente da Adega O Cepado, emprazada en Rubiá, que elabora catro referencias de viño distintas (dúas de branco e dúas de tinto). “Comezamos a podar a principios de xaneiro, con máis retraso do habitual, e agardamos que no que queda de febreiro poidamos concluir as tarefas de poda”, destaca o responsable desta adega de corte familiar, na que traballan catro persoas.

Para Fernández, aínda é cedo para pronosticar se a de 2020 vai ser unha boa colleita. “Dependemos do tempo”, vaticina. “Despois da choiva inusual da primeira parte do inverno, vemos agora que estamos tendo moi altas temperaturas. Se a viña ten humidade na raíz e por riba non vai o frío que debera facer nesta época do ano, pode suceder que brote antes de tempo e isto é un perigo en caso de que haxa xeadas máis adiante”, afirma.

A visión dun viticultor
Da mesma opinión é Manuel Prada, un viticultor de 35 anos que leva dez traballando como autónomo. Produce uns 45.000 quilos de uva ao ano que despois destina a adega Viña Costeira. Ao igual que se fixo na Adega O Cepado, Prada viuse obrigado a comenzar os traballos de poda a mediados de xaneiro. “Normalmente comezaba en decembro, pero este ano co que choveu non puiden”, destaca. “Porque ir de poda chovendo non é o máis recomendable. Se hai doenza na vide pódese estender ao cortar”, abonda.

Este viticultor, que traballa terreos propios e alleos en diferentes municipios valdeorreses como A Rúa ou Vilamartín, non se atreve a adiantar como vai ser a colleita deste ano. “Aínda é moi cedo. Ata meter as uvas na adega non se sabe”, destaca Prada que engade, ademais, que o máis importante agora son as tarefas de poda e para finalizalas “aínda quedan algunhas semanas por diante”.

O viticultor Manuel Prada podando unha viña na Rúa

 

[arriba]

Novas Anteriores